انهاردة هشرح لكم طريقة عمل كحك العيد الناعم بحشو العجمية والملبن بالصور والخطوات والشرح بالفيديو فى اخر الوصفة كأنك في مطبخي فتابعوا معايا.
المكونات والمقادير
- كيلو دقيق.
- 500 جرام سمن بلدي سائح دافئ وممكن نزيد ل 510 او 520 للناس اللي بتحبة ناعم جدا.
- ربع معلقة صغيرة ريحة كحك.
- نصف كوب ماء عادي.
- معلقة صغيرة باكينج بودر.
- 3 معلقة كبيرة سمسم محمص.
- معلقة كبيرة خميرة.
- 2 معلقة كبيرة سكر.
طريقة عمل كحك العيد الناعم
نخلط المواد الجافة مع الدقيق ونذوب الخميرة في الماء وتترك جانبا.
نخلط في العجان بالمضرب الكف نضيف السمنة الدافئ الي خليط الدقيق ونسيبه شوية.
يصبح ناعم بالشكل دة مش بس كتير يا دوب نغلف حبات الدقيق بالسمنة ثم نضيف الماء ونلم العجينة بدون عجن.
ثم نغطي العجينة بالنايلون ونضعها في مكان بارد او في الثلاجة مش اقل من ساعتين.
ودة شكلها اول ما تخرج من الثلاجة تطلعها قبلها بساعة مثلا لأنها هتكون متجمدة ونفكها باليد الأول حتى لا تكسر العجان ثم تضربها كويس جدا بالمضرب الكف او تنعميها باليد متخافيش مش هتشد ولا حاجة بالعكس هتنعم جدا لأن البرودة بتموت الجلوتين اللي في الدقيق فمش هتعمل عرق بالعكس هتنعم وتبيض خالص.
دة شكلها او لما طلعت من الثلاجة وفكيتها باليد.
وهنا بعد ما نعمتها بعد الثلاجة.
هنختبرها باننا ناخد كرة من العجين ونضغط عليها باليد لو عملت تشققات تبقي محتاجة لفة كمان علشان تبقي ناعمة وماتشققش.
هنبدأ بقي ناخد كرات بحجم 30 جرام ونكورها كويس باليد ونحشي ملبن او عجمية وإحنا عملنا العجمية في فيديو سابق هنا او عين جمل أو يترك سادة حسب الرغبة.
وينقش بالنقاش او بالبصامة حسب الرغبة.
ويرص علي صاج او صينية الومنيوم بدون اي دهان خالص وبمجرد الانتهاء من التشكيل نخبز مباشرة بدون ما نريح العجينة.
تسوية كحك العيد
لو سادة علي درجة حرارة 160.
لو محشي ملبن علي درجة حرارة 180.
لو محشي عجمية علي 200.
التسوية مختلفة في كل نوع.
ويترك علي الصواني الي ان يبرد تماما بدون لمس انا بسيبه لتاني يوم.
ويزين بالسكر ويقدم بالف هنا ناعم جدا وده شكله بعد ما استوى ويرش بالسكر ويقدم.
والأفضل أننا نحط السكر المطحون الناعم عند التقديم انا هنا حبيت أوريكم شكله لكن انا شيلته من غير سكر يا رب يعجبكم وبالهنا والشفا وكل عيد فطر وأنتم طيبين وبألف صحة وسلامة.
شرح فيديو عمل كحك العيد
وده فيديو شرح طريقة عمل كحك العيد الناعم اتمنى ان ينال اعجابكم.